Gattaca

Gattaca é unha película estadounidense de ciencia ficción-drama de 1997 escrita e dirixida por Andrew Niccol e protagonizada por Ethan Hawke, Uma Thurman e Jude Law. Producida por Danny DeVito, Michael Shamberg e Stacey Sher, a película estivo nomeada ese ano a un Óscar á mellor dirección artística.

Gattaca é considerada como unha película de culto e a historia foi descrita como unha distopía transhumanista.

Nun futuro non tan afastado, os pais deciden ter fillos coa axuda da enxeñería xenética para que teñan máis saúde e mellores oportunidades de conseguir bos traballos, gañar máis diñeiro e ter éxito na vida, fronte á posibilidade de que teñan que competir contra outras persoas que foron melloradas ao nacer, cos adiantos da enxeñería xenética e así poder cumprir os seus soños, con todos os dons necesarios para poder participar mesmo na conquista doutros planetas. Para ser seleccionados como astronautas e colonos espaciais, deben ter intelixencia superior, alta resistencia física, boa visión e ata poder prolongar máis a súa vida, ao non ter enfermidades xenéticas e problemas cardíacos, coa selección de nenos máis sans desde o momento da concepción, os pais seleccionan como queren ter aos seus fillos, desde o sexo do neno, especificar cor de ollos, cabelo e pel.

A película conta a historia dun neno que nace en forma natural e debe loitar para competir contra os outros nenos que recibiron a axuda xenética para mellorar a súa saúde desde antes de nacer, mesmo contra o seu propio irmán que é o favorito dos seus pais, para poder facer realidade os seus soños e gañarse a vida, o neno crece e soamente pode conseguir traballos de limpeza e asistencia en empresas, pero un día traballando na limpeza dunha academia privada de formación de astronautas, inscríbese na academia para formar astronautas e viaxar ao espazo, cun elaborado esquema de fraudes e enganos, para poder esquivar os controis do sistema, que buscan descartar a calquera persoa que non sexa perfecta e non teña bos xenes na sociedade.